બોલકી ધરતીની વાતો સાંભળીને આજે પાણીનું બુંદ પણ આપણી સાથે વાતો કરવા આવ્યું છે .પાણીનું બુંદ કહે છે કે વાદળ ઉમટી પડે અને ગોરંભાયેલું નભ જોવું કોને ન ગમે? એમાં પણ વળી બફારાના લીધે ચામડીમાંથી પરસેવાની ગંધ આવતી હોય ત્યારે તો ખાસ એવી ઇચ્છા થાય કે કાશ હવે તો થોડો વરસી જ પડે તો સારું લાગે. ધગધગતી ધરતીને ઠારવા અષાઢ વરસે છે. વરસાદની પોતાની કોઈ ગંધ હોતી નથી પણ એ જેને સ્પર્શે તેની ગંધ અપનાવી લે છે. હજી થોડાક સમય પહેલાં જે સડક , ઘરમાં ધૂળ ફેલાવતી હતી એ જ સડકની ધૂળ અને ખેતરની માટી વરસાદમાં પલળતાં જ ગંધમાં બદલાઈ જાય છે. ભીનું થયેલું ધાબું, બારસાખો, પલળી ગયેલાં વસ્ત્રો,વાડીના ઝાડવા,નહાતાં પાંદડાંની ગંધ અનેરી હોય છે .વરસાદનું એ પાણીનું બુંદ આ ગંધ આપણા સુધી પહોંચાડે છે .
